“Esperanto sur la vojo” en la muzeo

Vizitante kaj ludante en la muzeo

La pasintan 20-an de marto, la aktivaĵo Esperanto en Marxa (Esperanto sur la vojo) celis la regionon Subirats. La ekskurso komenciĝis en la trajna stacidomo de Lavern, la partoprenantoj promenadis sub la orientado kaj gvido de Karles Berga , kombinante esperantan instruadon kun ĝuado de la vitkultura naturmedio. Parto de la ekskurso celis la Muzeon de Esperanto de Subirats, kie la ekskursantoj povis informiĝi pri la historio de la lingvo kaj la movado kaj, ĉe la fino, lerni praktike la lingvon per ludado de didaktika esperanto-domeno (vidu foton).

La muzeo dankas la vizitantojn kaj instigas la daŭrigon de la iniciato Esperanto en Marxa kaj ĝian sukceson. Interesiĝantoj pri la partopreno en sekvantaj ekskursoj kaj proponoj povas informiĝi per la retadreso k.berga@gmail.com

Virinaj esperantistoj, protagonistaj en la Muzeo

Babilado: Virino kaj Esperanto

Malgraŭ la persistema pluvo, pasintsabatan 12an de marto, rimarkinda nombro de esperantistoj kaj simpatiantoj partoprenis la babilrondon Dona i Esperanto (Virino kaj Esperanto), organizita de la E-Muzeo de Subirats. Por rakonti pri sia sperto estis invititaj Teresa Massana, Montserrat Franquesa, Montserrat Parera, Gemma Armadans kaj Gisela Alcón. Ĉiuj klarigis pri sia rilato al esperanto. Speciala kazo estas tiu de Gisela Alcón, ne mem esperantisto sed kiu realigas nuntempe historian esplorlaboron pri la loka e-movado.

Malbona vetero kaj aliaj personaj kaŭzoj malpermesis lastmomente la partoprenon de tri aliaj esperantistinoj: Àngels del Pozo, Anna Maria Molera kaj Aida Sunyol.

Dum la babilado, diversaj intervenoj aludis al la rolo de virinoj ene de la kataluna e-movado kaj oni rimarkis ilian gravecon en la komenco de la 20 jarcento. Oni plendis ankaŭ pri manko de aranĝoj destinitaj al esperanto-familioj kompare kun tiuj okazantaj en aliaj landoj.

La ĉeestantaj virinoj substrekis la valoron de siaj vivspertoj, speciale tiuj rilataj al vojaĝado kaj al la kultura interŝanĝo kun tre diversaj homoj en egaleca komunikado.

Komplemente al la babilrondo oni organizis du gvidatajn vizitojn al la muzeo dum la semajnfino kun speciala atentigo al la virina kontribuo al Esperanto.

Martaj eventoj

Sabato, 12 de marto
13h‐ Gvidita vizito al la Muzeo de Esperanto de Subirats montrante specialajn enhavojn rilatantaj la rolon de la virinoj en la disvastigo de esperanto.
Eniro: 2 eŭroj (Ĝis 12 jaraĝaj, senpage) 

18h‐ Ronda tablo: “Virino kaj esperanto”, en la sidejo de Centre Agrícola de Sant Pau d’Ordal (Placo de Subirats, s/n).
Pere de la voĉo kaj la sperto de ok virinoj de malsamaj aĝoj ni povos malkovri kiel ili travivis kaj ankoraŭ nun travivas sian interrilaton kun esperanto kaj la valoroj de la komunikado kaj la diverseco.
Partoprenos: Teresa Massana, Montserrat Parera, Anna Maria Molera, Àngels del Pozo, Gemma Armadans Gil (ne konfirmita), Montserrat Franquesa, Aida Sunyol kaj Gisela Alcón.
Eniro: Senpage.

Ĉe la fino de la aranĝo oni regalos la ĉeestantaron per pokalo da ĉampano.

Dimanĉo, 13 de marto
13h‐ Gvidita vizito al la Muzeo de Esperanto de Subirats montrante specialajn enhavojn rilatantaj la rolon de la virinoj en la disvastigo de esperanto.

La muzeo en Kataluna Esperantisto

Mal->dekstren: D. Garcia, R. Hernández, J. Inglada kaj J. Tubau

La lasta numero de Kataluna Esperantisto (elŝutebla pdf), revuo de Kataluna Esperanto-Asocio, dediĉas unu tutan paĝon al informado pri diversaj aspektoj kaj la evoluado de la e-muzeo de Subirats. Ĝin verkis Joan Inglada laŭ la jena sinsekvo:

Enkonduko

Propono iĝi publika biblioteko

Gustumeti Esperanton

Favora ministro pri kulturo

Nova gvidanto

Tagoj pri historia memoro